من حكم القدر عليا اني اعيش خارج اليمن ومقدر لي اني ازور صنعاء مره كل سنة وطبعا "كيف صنعاء يا حظية؟؟" هو السؤال الذي قابلوني به ابي وامي واخواتي حين عودتي , وقتها استهلت اساريري وتربعت فوق الكنبة واستفضت شرحاً لأحوال صنعاء :
يا جماعة الخير ما صنعاء قدي عجب عجاب ....شوارعها نظيفة وملان اشجار وازهار والمرور منظم ولا عاد تلقى دباب يوقف في نص الشارع وينظر لك باحتقار لما تطلب منه يفسح لك الطريق ولا موتر ينط لك فجأة لقدامك او يزاحمك فوق الرصيف .
لا وايش كمان.....الماء قدو بيسفح من البيوت لدرجة ان المواطنين ماسكين دباب وبوالد ويرشوا الماء في الشوراع (يسقوا الزرع اللي امتلأت به صنعاء) ......ومن كثر مالتيار الكهربائي فائض اصبح المواطن ماشي ملذوع شعره واقف من الشحنات القهربائية , وطبعا ماعد فيش أي طوابير قدام المحطات عشان البترول والديزل خلاص اصلا بايخصخصوا شركة النفط ويكون يجي لنا البترول والديزل ديلفري للبيوت .
وطبعا مقدرش اقلكم سعادتي وانا بشوف ان الشحاتين اليمنيين اختفوا من الشوارع .....وتم استبدالهم بالسوريين (الله يرحم ضعفهم) ,لا وازيدكم من الشعر بيت الحملات الأمنية اللي مالية الشوارع واللي حسستني بالأمن والامان خصوصا والعسكري المعلول اللي شايل رشاش اثقل منه وماسك في يده اتريك ابو بطارية ويعمل فحص للعيون (شكلها حملة لمعرفة مدى استخدام المواطن اليمني للعدسات اللاصقة) ويسأل السواق وهو يتفل القات من فمه (معك سلاح ؟؟) .
حتى الشُقاة اللي في القاع قدهم لابسين بدلات ومنظمين ومعد فيش ريحة معفنه تستقبلكم اثناء مرورك من هناك , طبعاً الوعي السياسي ارتفع جداً عند المواطن اليمني لدرجة انه اول سؤال يسألك اللي يقابلك "أنت مع الحوثة ؟ او مع السلفيين ؟" ولما تسأله مين دول ؟ ومين دول؟ قطعوا ايد (الللي بالي باالكم ) ماله علم.
وبحكم اننا شعب مسلم ومحافظ وقبليي قد البنات يمشوا في الشارع بدون أي خوف ولا في سيارة توقف وتخطف بنات من الشوارع ولا في واحد شكله يخوف ومعفن يجلس في الدباب يتحرش بالسيدة الاربعينية اللي جالسه قدامه ولا يمد يده ويتحسس ظهر الطفلة ام 9 سنين اللي جنبها ......ابداااااااااااا استغفر الله هذاك الشي يحصل في بلاد الكفر احنا مسلممممممممممممين وقبااااااااااايل .
وبحكم اننا شعب مسلم ومحافظ وقبليي قد البنات يمشوا في الشارع بدون أي خوف ولا في سيارة توقف وتخطف بنات من الشوارع ولا في واحد شكله يخوف ومعفن يجلس في الدباب يتحرش بالسيدة الاربعينية اللي جالسه قدامه ولا يمد يده ويتحسس ظهر الطفلة ام 9 سنين اللي جنبها ......ابداااااااااااا استغفر الله هذاك الشي يحصل في بلاد الكفر احنا مسلممممممممممممين وقبااااااااااايل .
وبعدين اشوف الناس صحتهم احلوت كذا و سمنوا ولونهم كذا زهزه دورت على السر قالوا اصلا اسعار الخضار والفواكه انخفضت لدرجة ان الكيلو الطماطم قدو ب800 ريال (يابلااااااااااشاة) والشعب بطل يخزن والحدائق والمتنزهات والاماكن الثقافية والعائلية انتشرت لدرجة ان الناس مش عارفين فين يروحوا من كثر الخيارات فبيضطروا يخلوا عيالهم يلعبوا في الشوارع جنب حفر البيارات .
اما الاتصالات والانترنت.....شيئ متطور يعني مثلا تعبي الكرت ابو 800 ريال (ب950 تشتريه) تعمل مكالمتين وبـــــــــح كمل , اما لو تشتي تبعث ايميل تجلس نص ساعة زيد لو معك ملفات مرفقة خذ لك ساعة (تنمي علاقتك بجهاز الكومبيوتر حقك تجلس تدور وتقلب في الملفات القديمة وتكتشف انه معك العاب ماكنتش داري بها), وطبعا ممكن تنمية لروح الارادة والتحدي عنك يقطع النت فجأة وقتها يكون اختبار قوة الصبر لديك بأنك تعيد الكرة من اول جديد (حاسة انه وزير المواصلات دارس تنمية بشرية و بيطبق بعض المبادئ على المشتركين في الخدمات)
طبعا أبي وامي واخواتي فتحوا فمهم وعيونهم وتنحوا لوجهي ...........قلت لهم خاطركم باروح انام واخليكم تستمعوا بحلمكم وبكرة اكمل لكم الحكاية
وهذا علمي ولا جاكم شر......وحظية باتكمل لكم مذكرات رحلتها المكوكية في الاسابيع الجاية
