الاستاذة حظية ......والفعلة التربوية 2

في طريقي للمدرسة ومخي يضرب اخماس وأسداس حول سبب مرض بسمة واللي شخصه العم حمود على انه بسبب فجعة و الاستاذة حليمة مربية فصل بسمة صوتها يقرب في أذني كل ما قربت من المدرسة  ; مريت بعامل البلدية وهو يعفر التراب على اساس انو يكنس الشارع وقتها تذكرت المعركة الحربية اللي حصلت بيني وبين الاستاذة حليمة والأستاذة أمة الرزاق وكيلة المدرسة السنة الماضية بسبب المكانس وأدوات النظافة اللي طلبوهن من الطالبات بعد ما ابتدعوا حملة لتنظيف المدرسة على فكرة انا مش ضد تنظيف المدرسة وتعليم البنات تحمل مسؤولية نظافة المدرسة والشارع المحيط بها بس انا ضد انو الاستاذتان الفاضلتان يستولوا على الادوات ومواد التنظيف ويصادروهم لبيوتهم وينتقصوا من درجات مادة التربية البدنيه  للطالبات اللي مقدروش يساهموا في الحمله اللي معرفش ايش علاقتها بالنظافة !!!

وصلت و الطابور وقد كان بداء وصوت والأستاذة أمة الرزاق يجلجل عالياً وهي تتهدد وتتوعد الطالبات المخالفات للزي والمتأخرات واللي ما دفعوش اشتراك الاذاعة المدرسية (نسيت اقلكم انو الاذاعة المدرسية في مدرستنا تدفع الطالبات اشتراكات من اجل ان تحظى بنصيب في تقديم بعض الفقرات والفصل اللي من طالباته ما يدفعوا الاشتراك يحرم من المشاركة ويسمع زفة يومية في الطابور....ولما سالت ليش الاشتراك مش جهاز الاذاعة من الوزارة قالوا جهاز الوزارة تعطل وهذا اشترته المدرسة بالتقسيط والاشتراك لتسديد الاقساط...الكلام هذا قبل سنتين على فكرة !!!)

انتظرت وقت الاستراحة وبحثت عن أمل صديقة بسمة اللي كنت اشوفها تجلس معها دائما ولقيتها في نفس المكان اللي كنت اشوفهن فيه جنب خزان الماء  ...ناديت عليها وجت تجري لعندي اعطيتها قطعة شوكولاتة ورفضت تأخذها بأدب ولما قلت لها انها من بسمة أخذتها وسألتني عن حالها فقلت لها انها مريضه وعندها حمى ....تنهدت أمل وقالت” مسكينه بسمة اكيد يدها توجعها من لمن ضربتها الاستاذة حليمة ‟...وقتها مسكت نفسي من اني انط قدام أمل لاني كما توقعت الاستاذة حليمة لها يد (أو عصى ) في اللي حاصل مع بسمة

سألت أمل ” الاستاذة حليمة ليش ضربت بسمة يا أمل ؟ ‟ شفت نظرة ذعر في عيون أمل وقالت ”هااه لا لا ولا حاجة معرفش ‟ قلت لها و انا احاول أطمئنها اعشان تتكلم لأنها شكلها كانت مرعوبة ” أمل قلي لي وانا مابقولش لأي أحد ‟  شافتني بنظرة مترددة وتلفتت حولها وبدأت تسرد لي اللي حصل وكأنها تشوفه قدامها ”اصلا بسمة تضاربت مع فاطمة بنت الشيخ ‟ شافت امل في وجهى نظرة تساؤل وجاوبت سؤالي قبل ما اسالة وكملت الحكاية  ” فاطمة بنت شيخ الجامع قالت لبسمة انها كافرة و باتروح النار لأنها ما تلبسش حجاب ولا بنطلون ...هاااه بعدين يا استاذة فاطمة دهفت بسمة للارض وبسمة مسكت حجاب فاطمة بس من غير عاني والله  انا شفتها هي مسكته عشان ما تسقط على الارض ...وبعدين ابتعد الحجاب حق فاطمة وتضاربوا وبسمة ضربت فاطمة ‟ في هذه اللحظه شفت ابتسامة تشفي في عيون أمل واستردت انفاسها وكانت متحمسة تكمل الحكاية وكانت كل قليل تتلفت حولها يبدو والله أعلم ان الاستاذة حليمة معاها جواسيس في الساحة ”بعدين فاطمة راحت اشتكت للأستاذة حليمة ولما دخلت الفصل صيحت لبسمة وسألتها ليشت تضربي فاطمة وتبعدي حجابها ؟ فاطمة قالت عشان هي باتدخل النار لأنها  ماتلبسش حجاب وتشتي ادخل النار مثلها ...بسمة قالت للأستاذة شفتي يا استاذة فاطمة تقلي بدخل النار ودهفتني وأنا مسكت حجابها من غير عاني عشان ما أسقط للأرض ....فاطمة قالت صح يا استاذة هي باتروح النار ؟ يا استاذة حظية الاستاذة حليمة جابت العصى الكبيرة الخيزران و ضربت بسمة....بس بسمة ولا بكت وهي تضربها وقالت لها  يا أستاذة اللي يكذب كمان يروح النار وانتي كذبتي امس  لما الموجه سألنا على الدرس اللي ما درستينا وقلتي انو درستينا واحنا غبيات وما نفهمش... يوووه لو تشوفي بعد ماقالت بسمة كذا كيف ضربتها الاستاذة حليمة وكانت تصيح وتقلها انتي قليلة أدب وباتروحي النار وبعدين عاقبتها طول اليوم وجهها للسبورة وحتى الراحة مانزلت ولا اكلت حقها السندوتش‟ كملت أمل تحكي الحكاية وأنا كنت أحس ان الدماء تغلي في عروقي ومش عارفه كيف اتصرف ...و أمل انتبهت لاني تعصبت مسكت يدي وفي عيونها نظرة توسل وقالت لي ”أستاذة حظية الله يخيلك لا تقوليش لأحد لان الاستاذة حليمة قالت لو حد عرف باللي حصل بالفصل باتعاقبنا كلنا الله يخليك يا أستاذة لا تقوليش .....العصى حقها قوي توجع ‟

ما قولكم يا جماعة من  اللي بايروح النار بسمة و الا الاستاذة حليمة ؟؟؟