حظية وحورية ...ماضاع حق وراه مطالب

أكمل لكم حكايتنا انا وحوريه واللي حصل بعد المعركة الحربية   

في طريقنا للقسم وانا اتخيل شكل عمي مصلح حين يجي يخرجني وما عيفعل بي لفت لحورية وانا اشتي اكلها وهي مبتسمه ”يا خزوتنا

 يا شماتنا ذلحين انتي فرحه عنسير القسم واللي يبسرش يقل عنسير الوادي ...اسمعي قلي له انش اسفه وخليه ينزلنا هنا رضي عليش ...ابوش عيضربش يا حوريه ....عمي مصلح عيكسر عظامي لليوم الضربه حق المره الاولة في عظامي ‟ لفتت لعندي بربع عين وباقي شويه وتسفخني الكف الثاني بعد حق الضابط  ” يا جبانة ما ضاع حق وراه مطالب واحنا مافعلناش شي غلط ولا نستحي منه هو اللي يستحي اللي المره الاوله مد يده ومسك يدي والان جاء يدور حرشه ابسري يا حظيه هو الغلطان واللي يستحي مش احنا......وبعدا انتي مابش عليش شي انتي دافعتي عني وهو لو معه مشكله معي انا مش انتي اسكتي بس ولا توريش انش خايفه منه عيزيد ينتفخ ويستقوى علينا ‟ ومسكت يدي وهي ايديها باردات ثلج بس في نفس الوقت حسيت بقوة وشجاعة من قوتها ونظرة عيونها وهي تشوف للعسكر في عيونهم ومش خايفة ;وهم بيكلموا بعض ويشتوا يخوفونا من اللي ممكن يحصل لنا في القسم .

على فكره نسيت اقلكم انو صلاح ما ركبش معانا لانو عاقل الحارة أخذه معه فوق السيارة يمكن كان خايف لو طلع معانا لوحدنا هو العسكر يفعلوا بنا شي وهو مش بعيد عليه وسبقوا للقسم ; رن تلفون واحد من العسكر اللي معانا فوق الاوبل ”حاضر يا فندم حاضر الان ‟ غلق التلفون وطلب من السواق يوقف على جنب  والتفت لعندنا وكأني شفت نظرة فرح في عيونه ”اسمعي يا بنت انتي وهي الفندم قال عيعفي عنكن لكن ولا عاد نبسر لكن صورة في السوق هذا‟ وانا فرحت وقد كنت شاخرج من الطاقة مش الا من باب السيارة ....لكن حورية قالت للعسكري وهي معصبة ” يعفي عننا ؟؟ هيا اطلع للقسم ماشي  انا شاسير من نفسي‟ مادريت بنفسي إلا وأنا اهزرها من الستارة وأصيح ” انزلي  وتقرصي العافية خلي لنا حالنا رضي عليش ‟ ولكن يبدو ان يد حورية بعد الكف اللي لطشته لصلاح قدي خفيفة مسكتني من رقبتي وقالت ”ابسري تشتي تهربي سيري يا جبانه عشان المره الجايه يجي يفعل بش صلاح وامثاله اللي يشتوا انا ما شسكتش عن حقي ‟.....فكرت دقيقه قلت بيني وبين نفسي” اممممم والله ان حوريه صادقة لو محد وقفه عند حده المره هذه مد يده وقدام الناس وما استحاش مره ثانيه عيتطوال اكثر‟ مسكت يد صاحبتي وقلت لها ”عليه العار من فلت رفيقة ‟ وضربت كرسي السواق قلت له ”اطلع للقسم اطلع هههع قلك يعفو عننا يدور من يعفو عنه هو ‟

وصلنا القسم ونزلنا من الاوبل والعسكر باب القسم والناس بيتفرجوا لنا واكيد كل واحد قد فسر المنظر على مايشتي وحوريه لفت ستارتها ورفعت المغموق وقالت يارب ومسكت بيدي ودخلنا وصلاح وعاقل الحارة وصلوا في السيارة اللي بعدنا وصيح  الشيخ حزام عاقل الحاره لحوريه أكيد كان يشتيها تتراجع  لكن ما جاوبتش ودخلت للقسم للضابط المناوب

وقفنا قدامه وانا ارتعش واعرق واحس بدخان يخرج من اذني وحوريه ماسكه يدي وسمعنا صوت صلاح بيحطم ويرطم فوق العسكر للمه خلونا ندخل قبله للضابط المناوب قالت حوريه للضابط اللي التفت لعندنا وكانوا بيسألنا ما معاكن ”نشتي نقدم بلاغ تحرش يا فندم ‟ الضابط فتح فمه وكانوا اول مره يسمع كلمة بلاغ تحرش ”على فكره وقتها  ولا دريت من وين دريت حوريه بهذا الخبر‟ سأل الضابط اللي كان باين انو  مهتم والبلاغ ضد من وما هي القصه ؟ دخل صلاح يجري وقال للضابط ” ماعليك منهن انا بتصرف معاهن‟ قالت حورية بصوت ”مرتفع  اشتي افتح محضر وأقدم بلاغ تحرش في الضابط صلاح علي وعسكر الدوريه اللي معه في باب سوق القات ‟ برقت عيون الضابط وكانوا فرح واللي عرفناه من بعد انو الضابط هذا جديد في القسم والكل يشكر اخلاقه  وبينفذ القانون وانو دائما في مشاكل مع صلاح بسبب البلاوي اللي بيفعلها والله ربنا يحبنا وطرحه في طريقنا .

التفت لعندي انا و سألني ” وانتي ما معش؟؟ ‟ قلت له بكل شجاعة و انا طبعا باقي قليل و ادوخ من الرعب ”و انا والكل اشتي افعل بسمه ذيه .... محضر تحرش‟  التفت لعند حورية وفهم انو هي صاحبة الفكره واني انا مرافقه بس

قال لها ”محضر ضد ضابط ؟ معش شهود ‟... عاد حوريه اتنطق و إلا وسمعنا صوت لاثنين رجال بيقولوا ”احنا شهود يا فندم ‟ التفتنا انا وحوريه واحنا متأكدات اننا نعرف الاصوات هذه ايوه صوت سعيد اللي يبيع ماء في باب السوق وحميد المقوت اللي نجلس قدام دكانه وقتها وقع وجه صلاح أسود مثل الفحمة  وقد كان عينفجر غيض  وطلب منه الضابط انو يخرج من الغرفه بهدوء ; فتح الضابط محضر وأخذ اقوالنا وأقوال الشهود.

طلبوا منا نبصم على اقوالنا لكن حوريه قالت للضابط يقراء لها ما مكتوب في المحضر الضابط قرائه لها ورجعنا بصمنا لكن بعد ما كملنا وقال لنا انو بما ان البلاغ في ضابط فانه عيتحول الى الادارة المختصة في الداخليه وطلب مننا انو ما نسيرش  السوق الاسبوع هذا ;الضابط سأل حورية السؤال اللي انا كنت مراعيه بس نخرج من القسم عسب اسالها نفس السؤال قال لها ”يا حورية قلي لي كيف عرفتي انو مهم تعملي محضر تحرش وانك ما خفتي انو ضابط ؟‟ حتى سعيد بائع الماء وحميد المقوت وعاقل الحارة كانوا مراعيين للإجابة.

لمعين عيون حوريه بالفرحه والنصر وقالت ”انا سمعت واحده عندنا في الحاره بتتكلم عن التحرش وجلست اسالها ماهو يعني ودريت انو ما بيفعله صلاح وبعض اللي بيشتروا مني اللحوح يعتبر تحرش مفروض يعاقب عليه القانون وقالت لي ما تخافيش كوني دافعي عن نفسش وماتسكتيش وانتي مابتفعليش شي غلط ولو وصل الامر تسيري تفعلي محضر تحرش انتي صح وما تخجليش ‟.

تحول البلاغ للداخلية وبعدها ما عاد ابسرناش صلاح ولا العسكر اللي كانوا معه......ورجعنا نبيع في السوق والناس تغيرت معاملتها لنا قوووي وبيتعاملوا باحترام وأدب لأنهم عرفوا اننا ما نسكتش عن حقنا.

نسيت اقلكم انو حورية خطبها حميد المقوت وشرطت عليه انو تجلس تبيع اللحوح قدام باب الدكان حقه و وافق .....وأنتي لش الله يا حظية  

حظية وحورية .....والمعركة الحربية

يا فتاح يا عليم يا رزاق يا كريم .قمت من النوم على رائحة الملوج الذي  تخبزه أمي و اسير السوق ابيعه   والذي غير مسموح لي ولإخوتي السبعة أن نأكل منه إلا ما سقط في التنور سهواً او ما حرق على امي ; و صياح عمي مصلح  زوج أمي (هو عمي أخو أبي تزوج أمي بعد وفاة أبي من أجل رعايتنا يا سعم )  وهو يسأل بغضب "  وين حظية؟؟"  ...اسمع صوت أمي خائفاً يأتي من خلف طقطقة الحطب في التنور " حظية عادها راقدة " فإذا بصوت عمي يعلو وهو متوجها نحو الغرفة التي أنام بها أنا وأخواتي البنات (نحن أربع بنات و3 أولاد أنا أكبرهم ) " حظية .....حظية رقدة أهل الكهف لهذه الساعة "

نكزت مفجوعة  ومسحت ما تبقى من اثر للنوم في عيوني على اساس  اني قدمن من النوم جالسة ارفع الغرفة  الغرفة زبط عمي مصلح الباب بقوة اهتز لها زجاج الشباك الوحيد في الغرفة اللي بننام ونأكل فيها ونستقبل الزوار (اذا سمح لنا) وقال " قمتي قامة قيامتك هيا فيسع عاوني امك ورصي الملوج وجهزي نفسك اليوم اتسيري عند سوق القات" اهتدمين بطوني لما سمعت "سوق القات" حاولت ان اطلب منه ان اجلس في مكاني المفضل جنب الجامع ولكنه رفض وقال " سوق القات أحسن ...المصليين ماهمش حق شراء" جاوبته وانا شانفجربكى " بس يا عم مصلح حق سوق القات قليلين أدب و حق مجابرة مش حق شراء ...يشتري ملوجه بمائة ريال و يجابر بألف"  زمجر العم مصلح بغضب  "حظيـــــــــــة من غير هدار قومي يله ومشتيش ترجعي وعاد معش ملوجة".

لبست ستارتي و المغموق و القفازات السوداء  وحملتني أمي الملوج فوق رأسي ودعت لي بأن يجنبني الله عيال الحرام اللي انا اصلا سايرة لعندهم بأرجلي .

 مشيت  لسوق القات ورجل تتقدم ورجل تتأخر و أنا أتمنى من الله أن يستجيب دعاء أمي ...في طريقي مريت من جبن ورشة إصلاح السيارات في شارعنا سمعت صوت الأسطى مقبل وهو يصيح فوق  أخي محمد ويسبه بألفاظ سيئة وكان نفسي ارجم بحجر يكسر زجاج السيارة اللي بيصلحها  (أخي محمد كان طالب في الصف الثاني الإعدادي وكان متميز في دراسته وكان يتمنى أن يكون دكتور  

ولكن بعد ما مات  أبي وعمي تزوج أمي أخرجه من المدرسة و أرغمه على العمل في ورشة مقبل) 

وصلت إلى السوق ودارت عيني فيه ادور على حورية صاحبتي اللي تبيع اللحوح في السوق ولقيتها  مكانها المعتاد وسرعت خطوتي وانا ماشيه لعندها وبسمع  كلمات وألفاظ من موالعة القات  السوق يقشعر لها البدن وصلت جنبها        " سلام عليكم يا حورية ...وعليكم السلام يا حظية ...ما هو كيف لوما انتي هنا اليوم ؟ وانتي مايعجبش تبيعي الا باب الجامع.... "  تنهدت بحرقة وقلت لها " عمي مصلح اليوم صملني اجي هنا امره وحسبه الله ..قلي لي وين جت الأوبل مابسرتهاش في مدخل السوق ؟؟"  اقتلب وجهها وقالت وهي بتغطي اللحوح من الذباب بنرفزة "  اتعوذي من الشيطان اتذكريهم ايجو الان عليهم من الله مايستحقوا"

جلسنا والمشتريين بيجوا لعندنا  منهم من يشتي يشتري الملوج واللحوح وبعضهم حق مجابرة ولغاج  وفي اللي يشتي من يؤانسه في مجلس قاته وأنا وحورية نحاول ان نتغاضى  ومانسمح لاح يتطاول ولا نجاوب الا بالإشارة بعد ماوقع في السوق قبل شهور  لما حولنا السوق لساحةحرب عندما حاول ضابط النجدة اللي اسمه الفندم صلاح  انو يمسك يد حوريه وهي تمد له اللحوحه  وشهرت به ملان السوق ومسكته من رقبته وماعد فضها الا الشيخ حزام عاقل الحارة وخرج صلاح من السوق وهو يتهدد انو ايكسر شرف حورية ومن وقتها عرف  المقاوته  اننا منطقة خطر ممنوع الاقتراب او التصوير .

واحنا منهمكات في البيع والشراء والحرص على انو محد يغالطنا او يتبلانا انو مد لنا البيس وهو كذب نسمع صوت  سارينة سيارة النجدة بيقرب من السوق التفتنا لبعض انا وحورية وكنت اشتي اقوم اخطى لي من هنا ولكن حورية بعنادها اصرت على ان نجلس وقالت لي وعيونها الخضر تبرق بالتحدي ”مشو سوق ابوه والله ما نقوم  و المرة هذه لو زيد فعل شي يا انا يا هوو ‟

وقفت السيارة وتنبه لنا الفندم صلاح ولمحت في عيونه نظرة حقد وغل ......نزل من السيارة وقرب لعندنا والمقاوته كلهم انتبهوا اللي خرج من دكانه واللي شل العلاقية من يد الزبون وبطل يبيع له واللي بلع الفذاحه اللي كانت في فمه  

قرب  والشر يتطاير من عيونه والتفت انا لحوريه وانها بتلفت لعنده وعينها في عينه بتحدي  .....وقف قبالنا وتفرج لنا باحتقار وقال ”مش قلنا لكن ممنوع تبيعين هنا؟؟؟ يله انقلعين ولا عاد ابسر لكن صورة في السوق ‟ قد كانت حورية عترد عليه قرصتها في ركبتها وقلت له ”ان شاء الله انكمل الللي باقي معانا ونخطا لنا ‟ التفت لحورية وقال ”كيف لوما اليوم بنت سعيدة الملحلحة وناجي السكران  ساكته اليوم بلعت لسانها او مه ؟‟ وقتها عرفت ان المعركة الثانية عتبداء والله يستر (بالرغم انو ابو حورية سكران 24 ساعة وهي تكرهه لانو يضربها هي وامها بس ما تسمحش لاحد يتكلم عليه).

لفتت له حورية وقد عيونها بتتشارر ” ماعليك من ابي وامي واحنا في ملك الحكومة مش في باب بيتك‟ قرب منها صلاح ومد يده للغطاء حق اللحوح اللي قبالها وقال لها ”لو عند ابوش شرف مانتي جالسه تطرطري من سوق لسوق يابنت السكران وانا هنا الحكومة ‟ وقلب لها اللحوح للأرض .....انا طبعا قد كنت لفيت باقي الملوج وحضرت نفسي للمعركة ويدي قريبة من الشبشب حقي ”عز الله القارئين‟ وانتي يا حوريه خفي يدش وطاااااخ فوق وجه الفندم العسكر اللي فوق السيارة نزلوا جري والمقاوته قربوا وفي ناس هربوا طبعا وصلاح وقع مثل الثور الهايج وبدء يشتم ويسب و  مد يده ايضرب حورية وانو لقي له ضربه فتاكه فوق راسه من شبشب حظية ; مسك يدي عسكري من حق الدوريه

والفندم صلاح مسكه حميد صاحب دكان القات اللي بنجلس جنبه وقال له يافندم مش هكذا وبيصيح فوقنا ويلاعن وانا داريه انو فارح بالللي فعلناه به (هذا الصلاح اصلا قد المقاوته باغرين منه يفرض عليهم اتاوات ويخزن له وللعسكر ببلاش..يعني حاميها حراميها )  ; وقف صلاح وصيح للعسكر ”هاااتوهن للاوبل وطلعوهن القسم الان‟ هو قال القسم وهاتوهن يعني احنا الثنتين يعني عيشلوني انا وحوريه للقسم  اهترعين بطوني وانا ابسر عمي مصلح يخرجني من القسم وما ايوقع بعدها

حورية قالت ”القسم القسم وانا اقدم فيك بلاغ تحرش ما هذه المره وانشوف من اللي صاحب الحق ‟ حاول بعض المقاوته وعاقل 

الحارة انو يراجعوا صلاح وهو ابدا ويده فوق خده اللي لطمته عليه حوريه

وشلونا فوق الاوبل للقسم........تشتوا تعرفوا ما وقع بي انا وحورية في القسم ؟ راعوا لي الخميس اللي عيجي 

الاستاذة حظية ......والفعلة التربوية 2

في طريقي للمدرسة ومخي يضرب اخماس وأسداس حول سبب مرض بسمة واللي شخصه العم حمود على انه بسبب فجعة و الاستاذة حليمة مربية فصل بسمة صوتها يقرب في أذني كل ما قربت من المدرسة  ; مريت بعامل البلدية وهو يعفر التراب على اساس انو يكنس الشارع وقتها تذكرت المعركة الحربية اللي حصلت بيني وبين الاستاذة حليمة والأستاذة أمة الرزاق وكيلة المدرسة السنة الماضية بسبب المكانس وأدوات النظافة اللي طلبوهن من الطالبات بعد ما ابتدعوا حملة لتنظيف المدرسة على فكرة انا مش ضد تنظيف المدرسة وتعليم البنات تحمل مسؤولية نظافة المدرسة والشارع المحيط بها بس انا ضد انو الاستاذتان الفاضلتان يستولوا على الادوات ومواد التنظيف ويصادروهم لبيوتهم وينتقصوا من درجات مادة التربية البدنيه  للطالبات اللي مقدروش يساهموا في الحمله اللي معرفش ايش علاقتها بالنظافة !!!

وصلت و الطابور وقد كان بداء وصوت والأستاذة أمة الرزاق يجلجل عالياً وهي تتهدد وتتوعد الطالبات المخالفات للزي والمتأخرات واللي ما دفعوش اشتراك الاذاعة المدرسية (نسيت اقلكم انو الاذاعة المدرسية في مدرستنا تدفع الطالبات اشتراكات من اجل ان تحظى بنصيب في تقديم بعض الفقرات والفصل اللي من طالباته ما يدفعوا الاشتراك يحرم من المشاركة ويسمع زفة يومية في الطابور....ولما سالت ليش الاشتراك مش جهاز الاذاعة من الوزارة قالوا جهاز الوزارة تعطل وهذا اشترته المدرسة بالتقسيط والاشتراك لتسديد الاقساط...الكلام هذا قبل سنتين على فكرة !!!)

انتظرت وقت الاستراحة وبحثت عن أمل صديقة بسمة اللي كنت اشوفها تجلس معها دائما ولقيتها في نفس المكان اللي كنت اشوفهن فيه جنب خزان الماء  ...ناديت عليها وجت تجري لعندي اعطيتها قطعة شوكولاتة ورفضت تأخذها بأدب ولما قلت لها انها من بسمة أخذتها وسألتني عن حالها فقلت لها انها مريضه وعندها حمى ....تنهدت أمل وقالت” مسكينه بسمة اكيد يدها توجعها من لمن ضربتها الاستاذة حليمة ‟...وقتها مسكت نفسي من اني انط قدام أمل لاني كما توقعت الاستاذة حليمة لها يد (أو عصى ) في اللي حاصل مع بسمة

سألت أمل ” الاستاذة حليمة ليش ضربت بسمة يا أمل ؟ ‟ شفت نظرة ذعر في عيون أمل وقالت ”هااه لا لا ولا حاجة معرفش ‟ قلت لها و انا احاول أطمئنها اعشان تتكلم لأنها شكلها كانت مرعوبة ” أمل قلي لي وانا مابقولش لأي أحد ‟  شافتني بنظرة مترددة وتلفتت حولها وبدأت تسرد لي اللي حصل وكأنها تشوفه قدامها ”اصلا بسمة تضاربت مع فاطمة بنت الشيخ ‟ شافت امل في وجهى نظرة تساؤل وجاوبت سؤالي قبل ما اسالة وكملت الحكاية  ” فاطمة بنت شيخ الجامع قالت لبسمة انها كافرة و باتروح النار لأنها ما تلبسش حجاب ولا بنطلون ...هاااه بعدين يا استاذة فاطمة دهفت بسمة للارض وبسمة مسكت حجاب فاطمة بس من غير عاني والله  انا شفتها هي مسكته عشان ما تسقط على الارض ...وبعدين ابتعد الحجاب حق فاطمة وتضاربوا وبسمة ضربت فاطمة ‟ في هذه اللحظه شفت ابتسامة تشفي في عيون أمل واستردت انفاسها وكانت متحمسة تكمل الحكاية وكانت كل قليل تتلفت حولها يبدو والله أعلم ان الاستاذة حليمة معاها جواسيس في الساحة ”بعدين فاطمة راحت اشتكت للأستاذة حليمة ولما دخلت الفصل صيحت لبسمة وسألتها ليشت تضربي فاطمة وتبعدي حجابها ؟ فاطمة قالت عشان هي باتدخل النار لأنها  ماتلبسش حجاب وتشتي ادخل النار مثلها ...بسمة قالت للأستاذة شفتي يا استاذة فاطمة تقلي بدخل النار ودهفتني وأنا مسكت حجابها من غير عاني عشان ما أسقط للأرض ....فاطمة قالت صح يا استاذة هي باتروح النار ؟ يا استاذة حظية الاستاذة حليمة جابت العصى الكبيرة الخيزران و ضربت بسمة....بس بسمة ولا بكت وهي تضربها وقالت لها  يا أستاذة اللي يكذب كمان يروح النار وانتي كذبتي امس  لما الموجه سألنا على الدرس اللي ما درستينا وقلتي انو درستينا واحنا غبيات وما نفهمش... يوووه لو تشوفي بعد ماقالت بسمة كذا كيف ضربتها الاستاذة حليمة وكانت تصيح وتقلها انتي قليلة أدب وباتروحي النار وبعدين عاقبتها طول اليوم وجهها للسبورة وحتى الراحة مانزلت ولا اكلت حقها السندوتش‟ كملت أمل تحكي الحكاية وأنا كنت أحس ان الدماء تغلي في عروقي ومش عارفه كيف اتصرف ...و أمل انتبهت لاني تعصبت مسكت يدي وفي عيونها نظرة توسل وقالت لي ”أستاذة حظية الله يخيلك لا تقوليش لأحد لان الاستاذة حليمة قالت لو حد عرف باللي حصل بالفصل باتعاقبنا كلنا الله يخليك يا أستاذة لا تقوليش .....العصى حقها قوي توجع ‟

ما قولكم يا جماعة من  اللي بايروح النار بسمة و الا الاستاذة حليمة ؟؟؟

الاستاذة حظية .......والفعلة التربوية

انه اليوم الاول من العام الدارسي حاولت ان اقوم من فراشي واستقبل هذا اليوم بنشاط وفرحة مثل ما كنت  في الاعوام السابقة ولكنني بدأت الحظ فتور في همتي عام بعد عام فجلست اردد مقولة شوقي قُـمْ للمعلّمِ وَفِّـهِ التبجيـلا كـادَ المعلّمُ أن يكونَ رسولا محاولة رفع معنوياتي اللي في الحضيض ; انا مدرسة لغة عربية واجتماعيات  ومربية فصل  ثالث ابتدائي في المدرسة الابتدائية حق البنات  اللي بحارتنا مع العلم انني خريجة علوم سياسية واقتصاد  وكنت احلم بالعمل في السلك الدبلوماسي بس لاني ما عنديش اكتاف اتشعلق عليها وشأت الاقدار ان يكون العم عبده سعيد جارنا يشتغل في الخدمه المدنية فعرض على ابي مساعدتي بالحصول على درجة وظيفية و التي كانت بمقابل اخر قطعتين ذهب من ما تبقى من مهر امي  وهو الشيء اللي عرفته بعد شهور من حصولي على الدرجة الوظيفية اللي ومع صدمتي بعدم قدرتي للعمل في مجال دراستي اعتقدت انه  على الأقل من حقي الحصول على وظيفة مجانا وأنا كنت من اوائل دفعتي .

وفي طريقي لدكان العم حمود عشان اشتري كيس من الحلويات من اجل طالباتي وهو شيء تعودت اسويه من يوم  ; تذكرت شكل الأستاذة حليمة في اجتماع المعلمين قبل عامين وهي معصبة وتصيح وتتهمني باني اقوم برشوة الطالبات وان كثير من الاهالي طلبوا نقل بناتهم للفصل الذي انا مربيته ...وكم ندمت لاني لم ارد عليها ان السبب مش كيس الحلويات اللي اوزعه عليهن ولكن  لاني لم ادخل يوم الفصل وفي يدي عصى اطول مني ولان صوتي لم يسمعه سكان البيوت المجاورة للمدرسة و انا اتهم طالباتي بالغباء  واكتب فوق جبهتهن انهن غبيات!!!

”يا مرحبا يا مرحبا صباح الورد للأستاذة حقنا ‟ استقبلني عم حمود من باب الدكان بابتسامته المعهودة ” كيفك يا بنتي ها رجعتي للشقاء الله يعينك ‟ رديت عليه بتنيهدة خرجت مني لا اردياً  ”ربنا كريم يا عم حمود انت كيفك وخالة ام خالد كيف صحتها؟‟ ... ”له الحمد يا بنتي خالتك يوم ستر ويوم لطف الله يشفيها  الحمد لله خالد قدر ينقل شغله من تعز بعد ما طلعت روحه وقد تسلف راتب سنة لقدام عشان ينقل درجته صنعاء ويكون هو وزوجته معانا ينتبهوا لها معي ‟ ...”الله يشفيها ويبارك له....هيا هات لي كيس الرشوة حق كل سنه‟ .....شافني عم حمود باستغراب وعلامة تعجب طلعت فوق رأسه وبما انو متعود اني اقول كلام مالو داعي ما سالش مد لي كيس الحلويات وحطه بالكيس ....دفعت له الحساب وقد اني ماشيه الا وهو صيح لي ”استاذه حظية ممكن لو ماعليك كلافة اطلب منك شي ؟؟‟ ...”أنت تأمر يا عم حمود من عيوني خير ؟‟ ...”بسمة بنت خالد ابني سجلناها بالمدرسة حقكم هي بصف رابع وانا مابقدرش اخليها اول يوم تروح لوحده ولا بقدر اوصلها واغلق الدكان قدك عارفه اول اسبوع بالمدارس عاد الاهل فرحانين بجهالهم يجبوا لهم حق الجعالة ...لو بس تمسكي بيده معك لباب المدرسه تعملي فيني خير ‟ وطبعا لانو عارف اني مابقول لا فتح الباب اللي يوصل من داخل الدكان للبيت وصيح لبسمه

خرجت بسمه بفرحة اول يوم دراسي لابسه زي مدرسي لونه اخضر ولكن اللي لفت نظري غير اللون الجرادي للزي اللي قلت يمكن انها الزي حقها في المدرسه اللي كانت بها بتعز او لبس عادي لسه ما اشتروا لها زي رمادي المقرر للمدارس  انها كانت ان شعرها كان ضفيره معقوده بشريط ابيض ولابسه شرابات بيضاء وحذاء اسود يلمع نظافة ذكرتني بنفسي وانا صغيرة..قال لها جدها ”بسومه باتروحي اليوم المدرسة مع الاستاذة حظية امشي عاقل هوانا باجي اروحك بالمرواح‟ قالت له ”حاضر جدو ‟و مدت يدها الصغيرة لي وعيونها تلمع برائه وذكاء .

ومشينا والا اشوف 2 بنات لابسات نفس اللون الجرادي وفوقهن حجابات بيضاء اكبر منهن يدعسنهن وهن ماشيات وكل ما اقتربنا من باب المدرسة و اسراب الجراد في تكاثر وفجأة تنبهت انهم غيروا الزي من الرمادي بس ما اكنت اتوقع اللون الجرادي القاتي هذا مساكين الاطفال ومساكين احنا المدرسات والمدرسين يعني فوق ما قد الفصول فيها اكثر من 70 طالب/ه يزيد لونهم يكون زي الجراد والله ظلم  دخلنا حوش المدرسة وانو ملان بالجراد بكل الاحجام يوووه الفعلة

مر شهر من بداية العام الدراسي وكانت بسمة و اسألتها  الذكية هي محور يومي وانتظرها يوميا تفاجآني بذكائها وسرعة بديهتها ولكن اليوم فاجأتني بسؤال ”أستاذة حظية....يعني ايش لغلغيه؟؟‟ ..... جت لي صدمه عصبيه من سؤالها”بسمة من فين جبتي الكلمة هذه؟‟ وقفت وشدت يدها من يدي وشافت لي بنظرة حزينه ”في واحدة بنت ما ترضاش تلعب معي وتقلي انتي لغلغيه...بس اني ما عرفتوش ايش يعني لغلغيه!! هي تسبني صح ؟ ‟ احترت ايش اجاوبها وكيف افسر لها وانزعجت من انتقال هذه الالفاظ بين الاطفال ”شوفي يابسومه هذه كلمة مش شتيمه وهي برضه مش كلمة كويسة والناس تقولها للي يكون من تعز بس هي حاجه سيئة ولازم ما نكن نقولها لاحد احنا كلنا يمنيين ونحب بعض ‟ ابتسمت و كأنها وجدتها وقالت ”هااااااااااه زي ما يقولوا دحابشي يعني !! أستاذة يعني ايش دحباشي؟؟ ‟ كملت عليا الصدمة و انقذني صوت الجرس ومسكتها من يدها قلت لها يله بداء الطابور وانا مش عارفه ايش اقول لها اصلا.

مريت بدكان العم حمود ومالقيت بسمه كالعاده تنتظرني الساعه 7.30 بالباب ...”صباح الخير يا عم حمود وين بسومة؟؟‟ .... ” والله يا استاذة بسمة من يوم الخميس تعبانه محمومة وبحالة‟ ...”سلامتها يمكن تكون اكلت ايس كريم ابو فيمتو اللي يبيعوه باب المدرسة خلاص الواجبات خليها اليومين هذه ترتاح وبرجع اذاكر لها اللي فاتها‟...” لا لا مش حمى مش حق برد حق فجعة يا استاذة‟....”كيف يعني فجعة يا عم حمود ؟؟‟ ....” مدري كأنوا أحد فجعها لأنها تهذي وهي محمومة وتفز من النوم تصيح بسمة ما تروحش النار بسمه حبوبه ماتروحش النار ‟

مش عارفه ليش اول ما قال لي عم حمود الجملة هذه نطت قدام عيوني الاستاذة حليمة مربية فصل بسمة !!!.

من اللي فجع بسمة وايش فجع بسمة .....هذا اللي بتعرفوه الخميس الجاي 

طفولة برسم البيع

عروستنا قمر نوااااار ....سبحان الذي صووور .....اتى صوت عاليا صاخبا ليوقظني من نومي الذي حصلت عليه بعد ثلاث ايام مناوبة في المستشفي حاولت اغطي راسي بالمخدة واذا بصوت ايوب طارش يصدح عاليا ويأمر برش العطور الكاذيه.... يعني في عرس في الحارة

من تحت لحافي صحت اماااااااااااااااااااه عرس من ؟جاوبتني امي بصوت بعيد يدل على ان راسها داخل الموفى

عرس سميرة بنت الحاج سعيد ......حاولت ما اصدق اللي سمعته وقلت من ؟؟ قالت سميـــــرة بنت الحاج سعيد

نطيت من فوق السرير بحركة بهلوانيه وقطعت الغرفه والصاله في خطوات غزاليه  وقفت قدام امي اقلها سميره ؟ سميرة بنت الحاج سعيد ؟ سميرة اللي كنت اذاكر لها السنه اللي فاتت وهي 2 اعدادي ؟؟؟؟ قالت امي ايوه سميرة وقد وصت لنا ام سمير نروح نتغدا عندهم  اليوم من قبل 3 ايام بس انتي كنتي مناوبه نسيت اقلك قالوا باتتزوج واحد من بلاد ابوها 

طرت لغرفتي البس البالطو حقي وامي المسكينه تجري ورايا وهي تعرف بالطبع ما انوي عليه قالت لي حظية بطلي معقله ايش عليك من الناس مش يكفي اللي سويتيه المرة اللي فاتت بزواجة نجوين بنت فايزة اللي تبيع البخور ”برجع اقلكم ايش سويت بعرس نجوين ‟ يا ماه حرااام البنت عمرها مايجييش14 سنة ...يابتي واحنا ايش علينا هم اخبر ببنتهم امي تقلي وهي تمد يدها تخلسني البالطو واني اغلق الازرار واجري للشارع وفي راسي تقرع طبول وصوت يقول زواج سميرة من عتريس بااااطل..... بااااطل

دخلت بيت الحاج سعيد والباب مفتوح والمسجله معلقه بالطاقة وريحة الزربيان ملان الحوش وعيال الحافة يلعبوا شافتني ام سمير وجت فرحانه تسلم عليا ”يا حيااا واهلا ومرحبا بالدكتورة حقنا نور العرس ‟ الله يحفظك يا خاله بس من صدق دا عرس سميرة ؟؟ ايوه يابتي عرس سميرة عقبالك اجا لها عروس من يافع من اهل ابوها .... ياخاله بس سميرة عادها صغيره عادها جاهلة حرام ماقديش حق زواجه عادها كانت تلعب بالحافة لقبل امس

شافتني الخاله ام سمير بنص عين وما عجبهاش كلامي قالت لي تفضلي لو باتتغدي اهلا وسهلا باقي شويه ونقرب للنسوان فين امك ؟يعني كانها بتقلي اسكتي ومالكش دخل والا قومي روحي بيتكم

دخلت للبيت اشوف سميرة لابسه درع اخضر تمشي وتدعس فوقه وفرحانه بالحناء  وكبش الفل اللي اطول منها شافتني وتقلي يا دكتوره تعالي شوفي وتمد لي يدها اشوف الخضاب والفرحه بعيونها البريئة قالت ابي اشترى لي شنطه كلها ثياب جديدة.

جلست وانا كلي حسرة وغيظ من كل النساء الموجودات اللي بيرقصين ويغنين ويشاركين في ذبح طفولة سميرة جت لعندي خالة فايزة سلمت عليا وقالت شفتي الدنيا حظوظ اجاء له شيخ من حق يافع مش مثل نجوين بتي ابوها زوجها لبن عمه الحراف قلت لها شــــيخ ؟؟ قالت ايوه يقولوا مزوج 2 كمان وكدا بايكون عمره يجي بالخمسينات كده .

 وقتها حسيت ان الدم يغلي في عروقي وقفت وخرجت للشارع ادور الحاج سعيد  شفته واقف جنب بياع الفل قربت منه قال لي اهلا هلا يا دكتورة عقبالك ....قلت له يا عم سعيد حرام عليك اللي تسويه بسميرة عادها جاهله وبعدين تزوجها براجل عمره اضعاف عمرها  هذا ظلم ...قال لي شوفي يا دكتورة بطلي الخبر دا انا تزوجت ام سمير وكان عمرها 15 وايش حصل ولاشي بطلوا الخبابير حقكم دي  ولو كان في ضرر من صدق كانت الدوله سوت قانون يحدد سن الزواج الرسول تزوج عايشه وعمرها 14 باتحرموا سنة النبي ...وقرب مني يقلي تعالي شوفي الموبايل اللي جاب لي الشيخ قحطان عريس بنتي هدية كي وريني كيف اكتب الرسايل فيبه مسكت نفسي وقتها كنت باكسره فوق راسه هو وقحطان ...قلت له يا حج سعيد اتقى الله في بنتك وقتها تغيرت نبرة صوته وحمروا عيونه و قال لي شوووفي قومي روحي بيتكم ولا تخربي علينا العرس زي ماخربتي عرس نجوين جلستي تصيحي صغيره مدري ايش اندكي جابت 3 جهال ايش استوى به  قلت له يا عم سعيد نجوين عندها فقر دم مزمن و2 من عيالها عندهم نقص نمو  قال حق الله قدر وكتب لهم كدا وهي زوجه مسكين مابوش معه بس الشيخ قحطان انا اقلك بايعيش سميرة ويعشينا بعز.

روحت وانا مقهورة وعرفت ان الحاج سعيد باع سميرة عشان شويه فلوس وذبح بنته وقتل براءتها عشان الموبايل والمهر بكيت ورقدت حاولت ادفن راسي بالسرير زي النعامه وانسى صوت الطبل والزمر اللي حولي وكلمة الحاج سعيد وهو يقلي لو كان في قانون يحدد سن الزواج  ترن بإذني.

مر على عرس سميرة اسبوع واليوم وأنا مروحة من المستشفى شفت ناس واقفين باب بيت الحاج سعيد قلت اكيد اجت سميرة زيارة ....قربت والا اسمع صوت بكاء ام سمير ونواحها  و كالعادة ام نجوين وكالة انباء الحافة لقيتها بوجهي  وهي تصيح وتبكي قالت لي شفتي الظالم قتل سميرة .......من اللي قتل سميرة يا ام نسرين انطقي ايش حصل ؟ قالت وهي تدق يدها بصدرها يابتي الشيخ قحطان موت سميرة قلك بعد الدخله نزفت وما رضيش يسعفها لما بعد يومين ودوها المستشفى وماتت وقتها انهرت صحت بصوت هستيري مسكت الحاج سعيد من ملابسه وصحت انت قتلتها انت موت بنتك ....وهو متبلد والدموع متحجرة بعيونه .

ماتت سميرة ومن ينقذ كل السميرات في بلادي ......ماتت سميرة ونواب الشعب بخلوا عليها بقانون يحميها ..ماتت سميرة ونحن كالنعام ندفن رؤؤسنا في الرمال .....وحظية مقهورة من قلة الحيلة .

طريق العودة

بعد رحلة الشتاء والصيف في الباص والدباب قررت ان اركب التاكسي وتوكلت على الله.

 أشرت إلى أول تاكسي فارغ أمامي لمحت ان السائق في متوسط العمر ولديه لحية صغيره توقف ركبت وقلت سلام عليكم لو سمحت شارع القاهرة فرد عليا و الاخت اللي كانت واقفة جنبك ما بتطلعش معك ؟؟ التفت للخلف اشوف بنت كانت واقفه قريب مني يبدو انها تنتظر دباب,قلت لا ماهيش معي!! قال لي اسف مقدرش اوصلك ما اجتمع رجل و امراءة إلا وكان الشيطان ثالثهما وقتها حسيت اني اشتي اخنقه قلت له والله ما شيطان إلا انت و امثالك !!!

نزلت من التاكسي وخبطت الباب بقوة انتبهت لي البنت وقالت: ايش ما اتفقتوش على قيمة المشوار ؟؟ قلت لها لا يشتي تجي معي انتي !!!

مر تاكسي أخر يقوده شاب أشرت له وبعد مشارعه ومبايعة على حساب المشوار والوصول إلى اتفاق يرضى الطرفين ركبت التاكسي ويدي على الباب كالعادة....فإذا بالسائق يوجه المرآة  التي أمامه كي يستطيع أن يراني وبداء بالحديث عن الازدحام وعسكري المرور والبائعين المتجولين  و و أنا أتجاهله فقال "عفواً يا أختي على إزعاجك بس الواحد من حال الدنيا بيشكي وأنا الصدق ارتحتوا لك من صوتك ماشاء الله صوتك جميل أكيد انك حلوة باين من عيونك  ايش رائيك نعمل لفة لعصر يعني كذا نجلس نفضفض لبعض وكذا يعني  ؟.

فإذا بصوت من داخلي يخرج بحزم " وقف عندك" قال وهو مستمر بالطريق ليش؟ يعني ما قد وصلناش للمشوار!!! فقلت بصوت أكثر حزما "وقف عندك او بافتح الباب" وكانت يدي على الباب ...وقف ونزلت ورميت له نصف المبلغ فوق الكرسي وهو يتمتم بكلام لم   

وأكملت مشواري سيراً على الاقدام ”وهي معاناة ثانية برجع أحكي لكم عنها مرة ثانيه‟

هذه كانت رحلة حظية من اجل الذهاب لعملها لجامعتها لزيارة أقاربها لقضاء احتياجاتها اليومية ; مأساة كل فتاة يمنيه مضطرة لاستخدام المواصلات العامة ....اغيثوا حظية لحل القضية 

حظية ورحلة الشتاء والصيف 2

حده مدينه....حده مدينه ....أشرت بيدي فتوقف الدباب"هو ذلك الباص الصغير الذي صنع خصيصاً لليمن" لا يوجد إلا مكان خالي وحيد في الخلف بجوار 2 رجال ...فتبرع شاب يبدو  من طلاب الجامعة كان يجلس بجوار السائق في الكرسي الأمامي بالرجوع للخلف وترك المقعد لي "على أساس انه أفضل" ويا حظية اطلعي جنب السائق ....

بداء الدباب  بالتحرك والسائق أيضا بداء بالتحرك وشويه اشوف المعوز اللي لابسه يرتفع  فوجدتني اصرخ فجأة ......" على جنــــــــب" فتعمد السائق تجاهلي فصرخت مرة أخرى بصوت أعلى لدرجة ان من في أخر الدباب صاحوا تقلك على جنب يا سواق حينها توقف ونزلت مذعورة ....

أعوذ بالله ما هذا لماذا انعدمت الأخلاق في بلادنا ؟ كنت أتسأل بيني وبين نفسي فوجدت فتاتين تقتربان مني تفوح منهما رائحة عطر نفاذة ويرتدين عباءات تكشف أكثر من ما تستر ومن الألوان ما ليس موجود في علم جنوب افريقيا ...قالت إحداهما يا أخت تنتظرين دباب ؟ أشرت برأسي بالإيجاب قالت نركب سواء عشان محد يجلس جنبنا بالكرسي الخلفي وقف دباب وكان سائقه من ذوي الدقون للبطون ركبنا ثلاثتنا في الكرسي الخلفي الذي صادف انه فارغ ...

فجأة يصدح صوت نانسي عجرم تعلن إنها مغرمة معجبة من شنطة الفتاة التي بجواري فأخرجته وأجابت مهاتفها  وصدحت هي ايضا بضحكة رنانة وكلام "تستحي حظية تسمعه وتقوله"  فما كان من السائق و الذي كان يستمع إلى شريط حول عذاب القبر الا ان يقوم بتغييره ورفع صوت رجل يصرخ بوجوب عدم خروج المرأة من بيتها 

بدون محرم ويفصل الوان العذاب الذي ستراه ...جاراتي ولا كأنهن يسمعن شيء وصلت إلي محطتي ونزلت

أخيرا انتهت المرحلة الأولى ...........وقررت العودة بتاكسي بعد انتهائي من عملي  لأنني لم اعد أطيق تكرار التجربة التي سيكون توقيتها ظهراً وما أدراكم ما يعنيه ركوب باص ظهرا في صنعاء اسألوا حظية.......سأكمل معكم طريق العودة الخميس الجاي باذن الله فانتظروني وجوا معي وأنسوني

حظية و رحلة االشتاء والصيف 1

أصبحنا وأصبح الملك لله

كعادتي حين أنوي استعمال المواصلات العامة لقضاء مشاويري قمت بتوشح السواد ولبست القفازات والشرابات وأسدلت خماري على وجهي فلم أعد أرى إلا بصيص ضوء ومررت بعم صالح صاحب العربية المتوقفة دوماً في مدخل حارتنا وصرفت منه الفلوس كي لا اقع في فخ "مابش صرف يا أختي" وتوجهت بخطى عسكرية كما توصيني جدتي دوما حين خروجي من المنزل قائلة " حظية ...امشي مثل العسكري وكوني رجاله" وفي طريقي إلي موقف الباص بدأت أتمتم دعاء ركوب الباص خاصتي " اللهم خارجني من المحاسبين الملغجين والسائقين المتهورين وأبعد عني الركاب المتلصقين وجنبني الراكبات الهدارات والأطفال المزعجين " .

 المشوار الأول خط الدائري  الزبيري  الحمد لله باص من ابو 24 راكب يعني سوف أتجنب المداحشة بإذن الله  مر الباص الأول ...ممتلئ ويفيض الركاب منه .....وما أن أقبل الباص الثاني وسمعت صوت المحاسب المعلق في باب الباص يشدو بصوت مزعج الزبيري الزبيري الزبيري .....  واعترتني قشعريرة " أعوذ بالله كم هو كريه هذا البني ادم " توقف الباص وإذا به  يقترب مني متسائلاً " الزبيري يا أبله ؟؟ " فلم أرد علية وتوجهت نحو الباب فقال موجهاُ حديثة  للسائق " الكبرة لله يا عموو".

الحمد لله وجدت كرسي فردي فارغ قريب من الباب ....ولكنه قريب أيضا من مكان توقف المحاسب ,بداء الباص في التحرك وبداء صوت يصدح من المسجلة  لفنان يبدو انه بيغني من وسط" قصعة" وبداء ايضا المحاسب في اسطوانة "الحساب يا ركاب الحساب الحساب" مددت يدي له بالخمسة وعشرين ريال ومتحاشية ان المس يده التي تعمد هو بحكم توقف الباص في اشارة المرور ملامستها ولذا ارتدي دوماً القفازات لتجنب هذه الملامسات المباغتة .
في الكرسي الموازي لي جلس شاب ملتحي يرتدي ثوب رجالي اغبر اللون " يمكن كان أبيض" وفي يده مسواك يتمسوك ويبزق بجواري  وبداء يعلن امتعاضه من الأغاني ويتأفف ويستغفر بصوت مرتفع ....فتنبه له السائق فتعمد أن يعلي صوت المسجل أكثر ويدندن مع الاغنية الغير مفهومة الكلمات بطريقه استفزازيه لآخونا;واما المحاسب "الكريه " قال اللي مش عاجبه يركب تاكسي انجيز ويسمع اللي يشتي وانظم الى السائق في ترديد اللحن .

حين وصل الباص الى جولة حدة الزبيري طلبت من السائق التوقف بعد الجولة فإذا بالمحاسب يبتسم وتبزر أسنانه التي أهلكتها الشمة ويقول "كملوا معانا لأخر الخط"هممت بالنزول ولكنه وقف على باب الباص متعمد ....قلت له بلهجة حادة "ممكن تفسح اشتي انزل" قال" ادعسوا فوق قلبي وانزلوا" فسمعت أخونا صاحب المسواك صاح " يا أخ عيب ما يصلح أفسح للأخت ".

هنا يبداء الخط الثاني لرحلتي الى مدينة حدة السكنية ...وهو خط المعاناة الحقيقي خط الدبدبي "الباص الصغير واصحاب تعز يسموه العكبار!!!!

انتظروني في الجزء الثاني من مذكرات حظية ورحلة الشتاء والصيف........لنكمل بقية الطريق

مذكرات حظية

اسمي حظية .....أيوة حظية..... ليش تضحكوا؟؟؟  (أبي كان يحب جدته وأسماني باسمها )

أنا حظية ........شمالية...جنوبية.....متحضرة.....قبيلية ..متعلمة ....أمية ....مدنية. .....رعوية .......بدوية ...أنــــا فتاة يمنية

سأكتب بالفصحى......بالعامية .....بالصنعانية.... بالعدنية.... بالتعزية ...بالسقطرية والتهامية  ...بالمهرية  والخبانية  ....يمكن اكتب بالشامية (بحكم تأثري بالمسلسلات التركية اللي كنا نشوفها قبل ما نرجع لعصر الجاهلية ونفقد الطاقة الكهربائية) ......لأنني فتاة يمنية

حظية .....طفلة...شابة ....أم....أخت....بنت ....زوجة ....جدة ...عمة...خالة ....حظية امراءة يمنية
حظية  في البيت ...في الشارع...في المدرسة ....في الجامعة ....في السوق ...في الباص...في المستشفي .....أين ما وجدت يمنية وجدت حظية

 مذكرات حظية.......مذكرات يومية لكل فتاة يمنية...ترويها لنا ليلة الخميس من كل اسبوع بإذن خالق البرية......ولكم الرائي في حل القضية

انا والتدوين

منذ وقت طويل وانا انوي ان اقوم بانشاء مدونتي الخاصة التي افرغ فيها تلك الافكار التي تتصارع داخل راسي وتحرمني النوم احيان كثيرة ولا اعلم لماذا تأخرت كل هذا الوقت مع انني استخدم الانترنت بشكل كبير يوميا وبشكل اصبح كالادمان ايضا 
كثير ما كنت اقراء مدونات لشباب مثلي واجد انهم يترجمون الكثير من ما يدور داخل ذهني الى كلمات مكتوبه واجد في نفسي الرغبة والحماسة للبدء في تدوين افكاري ....طموحي ....احلامي ومشاركة احزاني وافراحي قد لا يقراها احد غيري 
كنت اخطط من فترة لكتابة مدونة حول شخصيه فتاة يمنيه انقل فيها ما تعانيه المراءة في المجتمع اليمني وما تمر به من ويلات في كل ممارساتها اليومية ....وبالفعل بدات اكتبها ولم انهياها لا أعلم لماذا !!! ربما ابداء بنشرها الان في هذه المدونة لا اعلم