طفولة برسم البيع

عروستنا قمر نوااااار ....سبحان الذي صووور .....اتى صوت عاليا صاخبا ليوقظني من نومي الذي حصلت عليه بعد ثلاث ايام مناوبة في المستشفي حاولت اغطي راسي بالمخدة واذا بصوت ايوب طارش يصدح عاليا ويأمر برش العطور الكاذيه.... يعني في عرس في الحارة

من تحت لحافي صحت اماااااااااااااااااااه عرس من ؟جاوبتني امي بصوت بعيد يدل على ان راسها داخل الموفى

عرس سميرة بنت الحاج سعيد ......حاولت ما اصدق اللي سمعته وقلت من ؟؟ قالت سميـــــرة بنت الحاج سعيد

نطيت من فوق السرير بحركة بهلوانيه وقطعت الغرفه والصاله في خطوات غزاليه  وقفت قدام امي اقلها سميره ؟ سميرة بنت الحاج سعيد ؟ سميرة اللي كنت اذاكر لها السنه اللي فاتت وهي 2 اعدادي ؟؟؟؟ قالت امي ايوه سميرة وقد وصت لنا ام سمير نروح نتغدا عندهم  اليوم من قبل 3 ايام بس انتي كنتي مناوبه نسيت اقلك قالوا باتتزوج واحد من بلاد ابوها 

طرت لغرفتي البس البالطو حقي وامي المسكينه تجري ورايا وهي تعرف بالطبع ما انوي عليه قالت لي حظية بطلي معقله ايش عليك من الناس مش يكفي اللي سويتيه المرة اللي فاتت بزواجة نجوين بنت فايزة اللي تبيع البخور ”برجع اقلكم ايش سويت بعرس نجوين ‟ يا ماه حرااام البنت عمرها مايجييش14 سنة ...يابتي واحنا ايش علينا هم اخبر ببنتهم امي تقلي وهي تمد يدها تخلسني البالطو واني اغلق الازرار واجري للشارع وفي راسي تقرع طبول وصوت يقول زواج سميرة من عتريس بااااطل..... بااااطل

دخلت بيت الحاج سعيد والباب مفتوح والمسجله معلقه بالطاقة وريحة الزربيان ملان الحوش وعيال الحافة يلعبوا شافتني ام سمير وجت فرحانه تسلم عليا ”يا حيااا واهلا ومرحبا بالدكتورة حقنا نور العرس ‟ الله يحفظك يا خاله بس من صدق دا عرس سميرة ؟؟ ايوه يابتي عرس سميرة عقبالك اجا لها عروس من يافع من اهل ابوها .... ياخاله بس سميرة عادها صغيره عادها جاهلة حرام ماقديش حق زواجه عادها كانت تلعب بالحافة لقبل امس

شافتني الخاله ام سمير بنص عين وما عجبهاش كلامي قالت لي تفضلي لو باتتغدي اهلا وسهلا باقي شويه ونقرب للنسوان فين امك ؟يعني كانها بتقلي اسكتي ومالكش دخل والا قومي روحي بيتكم

دخلت للبيت اشوف سميرة لابسه درع اخضر تمشي وتدعس فوقه وفرحانه بالحناء  وكبش الفل اللي اطول منها شافتني وتقلي يا دكتوره تعالي شوفي وتمد لي يدها اشوف الخضاب والفرحه بعيونها البريئة قالت ابي اشترى لي شنطه كلها ثياب جديدة.

جلست وانا كلي حسرة وغيظ من كل النساء الموجودات اللي بيرقصين ويغنين ويشاركين في ذبح طفولة سميرة جت لعندي خالة فايزة سلمت عليا وقالت شفتي الدنيا حظوظ اجاء له شيخ من حق يافع مش مثل نجوين بتي ابوها زوجها لبن عمه الحراف قلت لها شــــيخ ؟؟ قالت ايوه يقولوا مزوج 2 كمان وكدا بايكون عمره يجي بالخمسينات كده .

 وقتها حسيت ان الدم يغلي في عروقي وقفت وخرجت للشارع ادور الحاج سعيد  شفته واقف جنب بياع الفل قربت منه قال لي اهلا هلا يا دكتورة عقبالك ....قلت له يا عم سعيد حرام عليك اللي تسويه بسميرة عادها جاهله وبعدين تزوجها براجل عمره اضعاف عمرها  هذا ظلم ...قال لي شوفي يا دكتورة بطلي الخبر دا انا تزوجت ام سمير وكان عمرها 15 وايش حصل ولاشي بطلوا الخبابير حقكم دي  ولو كان في ضرر من صدق كانت الدوله سوت قانون يحدد سن الزواج الرسول تزوج عايشه وعمرها 14 باتحرموا سنة النبي ...وقرب مني يقلي تعالي شوفي الموبايل اللي جاب لي الشيخ قحطان عريس بنتي هدية كي وريني كيف اكتب الرسايل فيبه مسكت نفسي وقتها كنت باكسره فوق راسه هو وقحطان ...قلت له يا حج سعيد اتقى الله في بنتك وقتها تغيرت نبرة صوته وحمروا عيونه و قال لي شوووفي قومي روحي بيتكم ولا تخربي علينا العرس زي ماخربتي عرس نجوين جلستي تصيحي صغيره مدري ايش اندكي جابت 3 جهال ايش استوى به  قلت له يا عم سعيد نجوين عندها فقر دم مزمن و2 من عيالها عندهم نقص نمو  قال حق الله قدر وكتب لهم كدا وهي زوجه مسكين مابوش معه بس الشيخ قحطان انا اقلك بايعيش سميرة ويعشينا بعز.

روحت وانا مقهورة وعرفت ان الحاج سعيد باع سميرة عشان شويه فلوس وذبح بنته وقتل براءتها عشان الموبايل والمهر بكيت ورقدت حاولت ادفن راسي بالسرير زي النعامه وانسى صوت الطبل والزمر اللي حولي وكلمة الحاج سعيد وهو يقلي لو كان في قانون يحدد سن الزواج  ترن بإذني.

مر على عرس سميرة اسبوع واليوم وأنا مروحة من المستشفى شفت ناس واقفين باب بيت الحاج سعيد قلت اكيد اجت سميرة زيارة ....قربت والا اسمع صوت بكاء ام سمير ونواحها  و كالعادة ام نجوين وكالة انباء الحافة لقيتها بوجهي  وهي تصيح وتبكي قالت لي شفتي الظالم قتل سميرة .......من اللي قتل سميرة يا ام نسرين انطقي ايش حصل ؟ قالت وهي تدق يدها بصدرها يابتي الشيخ قحطان موت سميرة قلك بعد الدخله نزفت وما رضيش يسعفها لما بعد يومين ودوها المستشفى وماتت وقتها انهرت صحت بصوت هستيري مسكت الحاج سعيد من ملابسه وصحت انت قتلتها انت موت بنتك ....وهو متبلد والدموع متحجرة بعيونه .

ماتت سميرة ومن ينقذ كل السميرات في بلادي ......ماتت سميرة ونواب الشعب بخلوا عليها بقانون يحميها ..ماتت سميرة ونحن كالنعام ندفن رؤؤسنا في الرمال .....وحظية مقهورة من قلة الحيلة .